• Italiano
  • English
  • Sardo

Ex Domu Canònicu Putzu

In su bixinau antigu de Ceràxius, in sa bia Dritta antiga, cussa chi imoi tzerriaus bia Roma, a su nùmeru 63 nc’est unu de is edifìtzius prus de importu po sa stòria de Ceràxius: sa ex domu de su Canònicu Felice Putzu.

Fraigada cun is làdiris sa domu campidanesa tenit sa lolla costumada cun arcus obertus de matonis de terracota, tenit duus livellus e in su passau imbordigaiat in prus de is aposentus printzipalis puru unu linnaxi, unu forru, unu magasinu e aposentus po amuntonai cosa postus, segundu is documentus de s’Ufìtziu Tènnicu Erariali de su 1940, prus chi totu a s’inforas.

Si podit intrai a domu a truessu de unu portali mannu cun arco a tutto sesto, batenti dustantis e batiporta a bisura de conc’e leoni chi pòmpiat in buca s’anillu de metallu.

A pustis si intrat in sa corti manna de aintru, allichidia cun prantas ornamentalis e cun su putzu. Cumenti in dònnia domu campidanesa, is aposentus si oberint bia a una lolla chi ddas amparat dae su callenti de istadi.

In custa domu, sa lolla est fata de duus livellus scongiuntaus dae tres scaleris: cussu prus mannu cun sa crobetura apoderada de pilastrus de linna, e s’atru acotzau a arcadas mannas de muradura. De innoi si intrat in d-unu aposentu mannu chi in su passau fiat su magasinu e chi oi allogat una arregòllida de pinturas. In custu logu su chi spantat de prus est seguru sa crobetura de traias de tzinnìbiri originalis e chistius beni meda. ùIn su primu pianu nci funt is aposentus de is meris, cun is bòvidas decoraus cun pinturas de muru a trassa liberty, stili chi agataus puru in is decoratzionis cun froris in is ventanas e chi si podint biri dae s’arruga e in sa parti de pitzu de sa faciada.

Bìvia dae su Canònicu Putzu finsas a su 1961, custa domu fiat stètia comporada in su 1989 dae su Comunu de Ceràxius e imoi allogat, su segundu domìnigu de Cabudanni, a “su cumbidu”, sa spadalia de sa coja cerexina costumada, e puru amostaduras e atrus eventus.

error: Contenuto protetto !!
In alto