Intrendi in sa crèsia e castiendi bia a s’altari de sa parti dereta, a pustis de sa cappella dedicada a su Cruxifissu, agataus cussa dedicada a sa Madonna de Ìtria, de propiedadi de sa cunfraria omònima, chi allogat unu retàulu (datau 1772-1785) de s’artista Antioco Diana. S’oru dòminat in is pinturas de s’obra: doradas funt is cuatru culunnas atrotiadas chi scongiuntant is nìcius, aici cumenti is disìnnius de froris chi ddas ingrunissant e cussus chi frunint sa palacadira.

Su nìciu de mesu arricit sa truma sculpia de scola napoletana comporada in su 1733 chi amostat sa Madonna de Ìtria cun duus libertus, in cussus de costau nci funt sa stàtua de santu Remundu Nonnato e santu Beneditu, issus e totu de scola napoletana.

Su faciartari est totu fruniu cun froris chi si simbillant cun cussus de is màrmuris de medas coloris intarsiaus.