• Italiano
  • English
  • Sardo

Retàulu de sa Madonna de s’Arrosàriu

Intrendi dae sa intrada printzipali de sa crèsia e castiendi bia a s’altari, a sa parti manca agataus sa cappella dedicada a sa Madonna de s’Arrosàriu, de propiedadi de sa cunfraria omònima finsas dae su 1650, chi chistit unu retàulu de s’acabu de su Cincuxentu chi amostat is Mistèrius de s’Arrosàriu.

S’altari de linna est stètiu aconciau in atrus annus (1772-1781 e 1862) chi ant pertocau siat sa strutura e siat is pinturas cumenti ant scavannau gràtzias a s’interbènnida de arrecasciadura de sa Soprintendèntzia de Casteddu. Pròpiu in su petantis de cussus traballus, sa limpiadura de sa palacadira at permìtiu de bogai a foras sa rapresentatzioni, fata in su 1772, de is cunfraris, e de is cunsorris, e de sa batalla de Lèpanto de su 1571, cuaus a suta de unu pillu de pintura chi strocit su màrmuri. No spantat su scioberu de fichiri in mesu a is Mistèrius de s’arrosàriu cussu acontèssiu si si pensat a s’importu cosa sua po sa stòria de sa Cristianidadi intrea.

In su tempus de gherra cuntra de is turcus, infatis, gràtzias a su traballu de is Dominicanus aiant nci fiat stètia una crescidura de sa devotzioni bia a s’arrosàriu chi beniat impreau po is oratzionis cuntra de is eresias musulmanas. Su retàulu est spratziu in tres partis una a pitzu de s’atra, in cussa prus a bàsciu nci funt tres nìcius chi chistint is stàtuas de santu Basìliu, santu Sebestianu e de sa Madonna chi donat s’arrosàriu a santu Domìnigu. Su nìciu de mesu, amanniau in su 1862, teniat finsas a cussu annu, una stàtua de sa Madonna cun pipiu, chi oi est chistia in sa crèsia de San Giuliano. Is nìcius funt scongiuntaus cun tàulas pintadas chi amostant cuàturu de is cincu mistèrius dolodosus. Sa parti mesana portat in mesu sa rapresentatzioni de su cravamentu e a costau de custas, in mesu a is culunnas scanaladas, cuàturu clipei cun su bassorilievo de is mistèrius gloriosus. Sa farta de is mistèrius gososus fait pensai chi una parti de s’obra s’est spèrdia in custus annus.

error: Contenuto protetto !!
In alto