Passillendi in su bixinau antigu de Ceraxius si podint biri ancora is portalis antigus de is domus chi nci funt sempri in is biddas de Campidanu: is domus campidanesas.

Si teneis sa bona sorti de ndi agatai una beni chistia e cun su portali mannu obertu, si bit deretu cumenti sa sobriedadi chi si bit a s’inforas, medas bortas chena nìsciunu nudeu, siat totu un’atra cosa castiendi a intru, aundi medas bortas sa lolla est totu pintada cun froris e s’incarat in d-una corti manna prena de matas de aràngiu, tupas aromàticas e froris. Cun sa fantàsia podeus fai unu brìnchidu a su passau: e bieus fèminas sètzias a suta de sa lolla fendi scarteddus o tessendi, is pipius gioghendi e is òminis torrendi a domu dae su sardu cun su carru tirau dae is bèstias, intrendi in sa corti atruessendi su portali.

Sa vida de sa famìllia, infatis, si passàt giai totu in sa corti de aintru e prus chi totu in sa lolla chi fiat su liòngiu de totus is aposentus chi si oberiant pròpiu a innantis de sa corti e depiat amparai is aposentus dae sa basca lègia de s’istadi.

Is domus campidanesas funt nàscias sighendi is sistemas de fraigadura antigus de su Mediterràneu, e po ddas fai ant impreau unu matoni particulari: su làdiri. Is matonis cruus, chi pigant su nòmini dae su latinu later, beniant fatus amesturendi ludu e palla e lassendiddus a suta de su soli a si sicai. Medas bortas fiant is meris de domu e totu chi fraigaiant is làdiris e sa domu dda amannaiant candu sa famìllia puru s’amannaiat. Su làdiri est unu materiali bonu meda: poita est unu isuladori bonu meda po is sonus e po su callenti, faiat sa domu sana e citia; una de is cosas lègias, chi fiant pagus, est chi cussus làdiris no podint aguantai cosas tropu grais, e intzaras is domus campidanesas funt a su màssimu de dus pianus (su pianu de asuta, fraigau cun perdas po aguantai su pesu e su primu pianu cun su làdiri).

A s’inforas is domus parint simpris meda, cun sceti is ventanas e su portali, medas bortas fraigau cumenti unu arcu “a tutto sesto”, calincuna borta totu decorau, e cun d-una porta de linna a duus batentis. Unu de is nudeus prus impreaus est cussu de ponni matonis cotus unu pagu incaraus po amostai beni sa bisura de s’arcu e totu (via Roma n’58); in atras domus dda pintànt cun su matessi arrebussu impreau po sa domu intrea, cumenti si podit biri in su portali de via Sant’Olmpia n’31 e in cussu de via Roma n’ 63.

A bortas su nudeu est fraigau cun perdas, cumenti cussas de s’arcu de intrada de sa ex Caserma Cavalleggeri (imoi SEMU) in via Dante n’2 o in via Sant’Olimpia n’19, aundi su matessi nudeu si bit puru a ingìriu de is ventanas. Interessanti po sa bisura sua est su portali de sa domu de via d’Azeglio n’6: unu arcu de matonis cotus imbasciau, aundi is listronis funt stètius segaus po fai prus manna s’obèrrida. Medas bortas nci funt puru nudeus in sa aici narada “chiave di volta” de s’arcu, cumenti cussa de su portali de domu Collu, in via San Giuliano n’7, chi est arricada dae modanaduras e aundi is matonis cotus funt impreaus po amostai mellus is elementus de sa strutura. In prus de sa parti de pitzu de s’arcu chi est postu a pitzu de listronis de perda, si podint castiai duas “paraste” de matoni chi artziant bia a sa grunissa modanada in sa parti de pitzu de su muru. Sa “chiave di volta” est decorada puru in su portali de intrada de sa crèsia de San Giuliano chi nc’est in s’arruga de via San Nicolò. Est unu portali de su sèculu XVII, decorau cun d-una arrosixedda scurpia in sa “chiave di volta” e follas e prantas in is trancafilus chi apoderant s’arcu. Sa decoratzioni sighit in sa parti de pitzu puru, aundi nc’est una cruxi e atras cosas de decoratzioni a trassa barocca.

Sa trassa barocca s’agatat puru in atrus portalis, cumenti cussu de via Dante n’33 , cussu in pratza Melvin Jones e cussu in via Canonico Putzu n’1, aundi su tìmpanu amostat nudeus chi a sa moda de cussu tempus favoressiant is lìnias curvas. De is primus annus de su ‘900 est sa domu de via Dante n’15-17. Sa strutura est fata de perda, sa faci amostat unus balconis e in s’arruga si oberit su portali de intrada a sa corti, imoi est aturau sceti s’arcu, e puru una portixedda cun arcu “a sesto acuto” ingrunissau, cumenti is ventanas, dae unu nudeu totu froriu a trassa liberty.