• Italiano
  • English
  • Sardo

Bibliotèca comunali (ex Domu Putzu)

Cussa chi a su tempus fiat una de is domus campidanesas prus bellas de Ceraxius imoi est sa sei de sa Biblioteca Comunali. Sa domu antiga chi nc’est in via Sant’Olimpia pigat su nòmini dae sa famìllia Putzu, chi nc’at bìviu po giai cent’annus. In mesu a is documentus prus de importu po sa fraigadura de sa stòria cosa sua eus agatau unu àutu notariali de su 1889, chi testimòngiat sa dàdiva de unus sartus e de una domu manna cun sa pratza, chi fiant ancora fraighendi, po parti de su meri de domu Efisio Luigi a su fillu Pietro a pustis chi si fiat cojau cun Annetta Frau su dus de gennàrgiu 1892. Pietro e Annetta ant tentu otu fillus e candu si funt mortus, sceti duus de issus, Igino e Annunziata ant eredau sa domu e ant bìviu ingunis in paris fintzas a is annus Otanta, candu si ndi funt andaus po sempri a bivi in Casteddu. Sa domu, sbuida po medas annus, est stètia comporada dae su Comunu de Ceraxius in su 2003.

Sa domu fiat stètia fraigada cun sa tènnica de su làdiri, matonis de ludu e palla beni cracaus e sicaus a suta de soli; is murus de a foras fiant amantaus de una camisa de ludu e cracina e fiant mannus meda, cussus de is aposentus de aintru fiant intonacaus e a bortas puru pintaus (is aposentus de rapresentàntzia). Sa crobetura fiat fata cun linna e cannitzu.

In prus de sa domu de su meri cun sa corti de rapresentàntzia cosa sua nci fiant puru una corti rùstica e una de traballu aundi biviat su sotzu, e una de tres parti aundi nci fiat s’ortu tancau e is domus de is traballadoris.

In mesu a is medas aposentus de sa corti de su meri nci fiant puru unu logu rùsticu cun sa crobetura, impreau a su cumintzu cumenti stadda e a pustis cumenti aparcadroxu po is veturas, unu putzu, unu forru e unu magasinu mannu aundi aiant afortiau sa crobetura faci a su 1920 ponendi una traia de cimentu armau, a cantu parit sa prima impreada in Ceràxius.

In sa corti rùstica nci fiant unu magasinu po is trastus chi no si imperànt prus, unu magasinu po su binixeddu, una staia po su molenti e dus aposentus impreaus po is trastus de messai e po sa motrici de sa trèbbia.

De sa strutura originali funt aturaus is murus sceti, ma podeus cumprendi cumenti fessant is aposentus in su passau gràtzias a is medas fotografias chi si podint castiai in sa amostadura permanenti tzerriada “Casa Putzu: stòria di una dimora ottocentesca” (Domu Putzu: contu de una domu de su Otuxentu), chi si podit visitai in unu de is aposentus de sa Biblioteca.

error: Contenuto protetto !!
In alto